Í Grunnskóla Hornafjarðar hefur skapast skemmtileg hefð í tengslum við Göngum í skólann þar sem bekkir keppa um hinn eftirsótta „gullskó“.
Keppnin er tvískipt, annars vegar á milli 1.–6. bekkjar og hins vegar 7.–10. bekkjar. Markmiðið er að hvetja nemendur til að nýta sér virkan ferðamáta og hefur keppnin vakið mikla eftirvæntingu meðal nemenda ár hvert.

Í ár stóð 4. bekkur sig best á yngra stigi en 7. bekkur bar sigur úr býtum á eldra stigi. Afhending gullskósins var gerð hátíðleg í íþróttahúsinu og að verðlaunaafhendingu lokinni tóku nemendur þátt í sameiginlegum „Just Dance“.

Grunnskóli Hornafjarðar var einn þriggja skóla sem dregnir voru út til þátttökuverðlauna í Göngum í skólann 2026. Skólinn hlaut 150.000 kr. gjafabréf frá Altis ehf. sem mun nýtast til að efla hreyfingu og íþróttastarf nemenda.